Madaxweynaha Jamhuuriyadda Soomaaliya Oo Ku Dhawaaqey Inay Jirto Musiibo Qaran, Islamarkaana Daah Furey Shirka..(Sawiro)

Madaxweynaha Jamhuuriyadda Soomaaliya, mudane Maxamed Cabdullaahi Farmaajo, ayaa furay shirka gurmadka Abaaraha Soomaaliya ee u dhaxeeyey beesha caalamka iyo dowladda Federaalka Sooomaaliya.

Madaxweynaha oo furay shirka gurmadka abaaraha, ayaa kudbaddiisa uga hadlay khatarta abaarta ka jirta gobollada Soomaaliya iyo haddii aan wax laga qaban dhibaatada ka dhallan karta, madaxweynaha ayaa sheegay in halista ugu daran ay tahay haweenka iyo carruurta ay saameysay arrintaasi, isla markaana ay waajib ku tahay dowladda oo kaashaneysa saaxiibadeeda beesha caalamka in si deg deg ah looga jawaabo oo gurmad la helo, abaarta waxa ay si la mid ah dadka u sameysay xoolaha iyo kaabayaashii kale sida biyaha iyo beeraha.

Madaxweynaha ayaa sheegay in shirka May ka dhici doona London ee arrimaha Soomaaliya looga hadlayo in ay geyn dooni istaraatiijiyad cad oo ay dowladda ka leedahay abaaraha soo laa laabtay, waxa uu ugu baaqay Midowga Africa, Midowga Yurub, OIC iyo saaxiibada caalamka in ay kala qeyb-qaataan badbaadinta nolosha dad badan oo Soomaaliyeed, madaxweynuhu waxa uu xusay in abaarta ay gobolka oo dhan ka jirto, laakiin Soomaaliya ay u nugushahay xilligaan, waxa uu si gaar ah uga hadlay in muhiimaddu ay tahay in gurmadka laga bilaabo waxyaabaha aas-saasiga u ah nolosha bini’aadamka.

Dhinaca kale wakiillada beesha caalamka, ayaa sameeyey ballan-qaadyo ay ku sheegeen in si deg deg ah loo fulinayo, Ra’iisul wasaare ku xigeenka Soomaaliya, Mudane Maxamed Cumar Carte ahna guddoomiyaha guddiga Gurmadka Qaran ee abaaraha, ayaa ka warramay natiijada ka soo baxdey shirkii maanta ee gurmadka abaaraha Soomaaliya looga hadlayey.

Hey’addaha gargaarka ayaa sheegaya in illaa 600,00 oo caruur ah ay qatar ugu jiraan xaalad nafaqo darro, iyadoo loo baahan yahay in la gaarsiiyo gargaar deg deg ah, dadka Soomaaliyeedna waajib gaar ah ayaa ka saaran gurmadkaan.

Ugu dambeyntii , Madaxweynaha ayaa si joogta ah ula socon doona xaaladaha abaaraha, si gurmadka loo fidinayo dadka Soomaaliyeed uu u noqdo mid gaaray meelihii loogu talagalay.

Aragtidaada Hoos Ayaad Ku Qori Kartaa
SHARE